مدت ہوئی ہے یار کو مہماں کیے ہوئے

مدت ہوئی ہے یار کو مہماں کیے ہوئے 

جوش قدح سے بزم چراغاں کیے ہوئے 

کرتا ہوں جمع پھر جگر لخت لخت کو 

عرصہ ہوا ہے دعوت مژگاں کیے ہوئے 

پھر وضع احتیاط سے رکنے لگا ہے دم 

برسوں ہوئے ہیں چاک گریباں کیے ہوئے 

پھر گرم نالہ ہائے شرربار ہے نفس 

مدت ہوئی ہے سیر چراغاں کیے ہوئے 

پھر پرسش جراحت دل کو چلا ہے عشق 

سامان صدہزار نمکداں کیے ہوئے 

پھر بھر رہا ہوں خامۂ مژگاں بہ خون دل 

ساز چمن طرازی داماں کیے ہوئے 

باہم دگر ہوئے ہیں دل و دیدہ پھر رقیب 

نظارہ و خیال کا ساماں کیے ہوئے 

دل پھر طواف کوئے ملامت کو جائے ہے 

پندار کا صنم کدہ ویراں کیے ہوئے 

پھر شوق کر رہا ہے خریدار کی طلب 

عرض متاع عقل و دل و جاں کیے ہوئے 

دوڑے ہے پھر ہر ایک گل و لالہ پر خیال 

صد گلستاں نگاہ کا ساماں کیے ہوئے 

پھر چاہتا ہوں نامۂ دل دار کھولنا 

جاں نذر دل فریبی عنواں کیے ہوئے 

مانگے ہے پھر کسی کو لب بام پر ہوس 

زلف سیاہ رخ پہ پریشاں کیے ہوئے 

چاہے ہے پھر کسی کو مقابل میں آرزو 

سرمے سے تیز دشنۂ مژگاں کیے ہوئے 

اک نو بہار ناز کو تاکے ہے پھر نگاہ 

چہرہ فروغ مے سے گلستاں کیے ہوئے 

پھر جی میں ہے کہ در پہ کسی کے پڑے رہیں 

سر زیر بار منت درباں کیے ہوئے 

جی ڈھونڈتا ہے پھر وہی فرصت کہ رات دن 

بیٹھے رہیں تصور جاناں کیے ہوئے 

غالبؔ ہمیں نہ چھیڑ کہ پھر جوش اشک سے 

بیٹھے ہیں ہم تہیۂ طوفاں کیے ہوئے 

Muddat hui hai yar ko mehman kiye hui

josh-e-kadah se bazm charagan kiye hui

karta hon jama phir jigar lakht lakht ko

arsa huwa hai dawat-e-mizgan kiye hui

phir waza ahtiat se rukne laga hai dam 

barson hui hain chak gireban kiye hui

phir garam nalah haye shararbar hai nafs

muddat hui hai ser chiragan kiye hui

 

phir parasish jarahat dil ko chala hai ishq

saaman sad hazar namakdan kiye hui

phir bhar raha hon khama-e-mizgan ba khoone dil 

Saz-e-chaman tarazi daaman kiye hui

baham digar hui hain dil-0-deedah phir raqeeb

Nazara-o-khayal ka saman kiye hui 

dil phir tawaf-e-koi malamat ko jai hai

pindar ka sanam kadah weeran kiye hui

Phir shok kar raha hai kharidari ki talab

Arz-e-mata Akl-o-dil-o-jan kiye hui

Dore hai phir har aik gul-o-lala par khayal

sad gulistan nigah ka samaan kiye hui

phir chahta hon nama-e-dil ka daar kholna

jan nazar dil farebi unwan kiye hui

Mange hai phir kisi ko lab-e-bam par hawas

zulf siyah rukh pe pareshan kiye hui

chahe hai phir kisi ko mukabil main aarzo

surme se tez dashna-e-mizgan kiye hui

aik nor bahar naz ko taake hai phir nigah 

chehra farog may se gulistan kiye hui

phir ji main hai k dar pe kisi k pare rahain

sar zer-e-bar minnat-e-darban kiye hui

ji dhondhta hai phir wahi phursat k rat dil 

bethe rahe tasawur-e-jana kiye hui

Galib hamain na chherh k josh-e-ashk se

bethe hai hum tahiya-e-tofan kiye hui